::b.i.s.o..b.o.n.a.r::

Hoben Jang Hoben!!

amaran: post kali ini menggunakan bahasa nogori. harap maaf kepada sesape yang sukar untuk memahami.

kamis potang, nani tetibo Ym ajak tengok bola. Pantang ado free time, misti ar nakkan. Tapi tiket dah hampir nyawo2 ikan dah. mano nak cokau? hasil usoho gigih Nani dan abang2, berjayo dapek ompek tiket.yey!! dengan itu, kompomla ese tak poie kojo sabtu tu..(haha..xdo kono mengono ngan kojo pon.sajo carik point nak ponteng..kikiki~). pado mulo eh takdolah semangat sangat nak tengok nogori main. buleh yo nak sokong klantan tapi orang yang dapekkan tiket tu sokong nogori so automatically menurut perintah arkan. incik amad pon follow walaupun ese tau ati dio menjorit2 taknak berpaling tadah dari nogori kelahiran eh. xaci pakai baju chelsea :-(. ese lahir KL so mano2 bleh sokong walaupun omak ayah pure nogori. hehe. ok. perjalanan program akan dicitokan melalui pic dibawah. perkhidmatan slr kami tidak diperlukan dalam event ni sebagai langkah keselamatan.

inilah ghupo eh tiket yang diidamkan.

macik nani dan mas sampai umah dalam kul4. macam tak beso. dokek kul5 baru tayar keto berpusing. ujan plak sikit2. 5.30 sampai Bukit Jalil.

Jalan jem gilo sampai kono pusing melawan arus. tak kesahlakan janji tak lalu jem and berharap dapek parking dokek. harap dan terus berharap.

tapi memang tak bleh harap. pak polisi ado dimano2. tak buleh nak parking sesuko ati dan perasaan. dokek IMU gak kono parking. mak ai..adolah 2 km kono jalan ke stadium. huh..turun sekilo.

bukti kono jalan jauh. adeh..kono enjoy setiap maso untuk elakkan raso lotih.

sampai dopan stadium tersilap port plak. termasuk kawasan ponoh baju merah. goron gak ar tengok. tapi kito kono professional ar. bilo lalu kek kawasan baju merah tu kono buek muko cam tak sodar pakai baju kuning. sonyum sepanjang maso. sonyum2 skit ngan abe2 kelate tu. hik3. last2 berjayo gak ar carik entrance nogori. sesampai orang tongah edarkan bendero free. memang rezeki. memang itulah yang dicari2 oleh makcik nani. masuk entrance tu ado polis pompuan cek beg. takut ese bawak bom la tu. ese pakai beg ngan kasut merah bajet nak kasi fairla klantan ngan nogori. last2 jadi macam bendero nogori plak. merah, itam & kuning :-p.

baru duduk. lom warming up lagi. duduk area fan club nogori. ado gondang bagai. nyanyi and sorak non stop. menrefresh balik lagu nogori yang ese dah lupo tu. time tkc dulu ponahla nyanyi..

dah ponek2 nyanyi, lapar. bukak boka. ponek2 ese masak tongahari tu. goreng bihun jo yang ese mampu. nak buek nasik lomak leceh plak. time ni memang kelakar. bukak yo tupperware tu, sume orang dopan, belakang, kiri, kanan sumo pandang. macam sumo agak terdiam gak ar 2 saat. sampai 3 row dopan pon pandang kitorang. polik. rupo eh sobab bau tu menusuk kalbu sumo orang. haha. hebat gak penangan bihun se tu. kih3..pehni dorang termimpi2 ar air tangan se. hehehe..

kek screen. 8.45pm mulo.



amaran pertamo.



amaran keduo.

tu dio. players dah mulo warming up. ese nak tengok 2 makhluk Allah tu yo. sapo laie kalo bukan si kombar tu. sumpah hensem! indah boto ciptaan Allah. patutla rita rudaini tu sanggup kawen kek siam. tak rugi sesen pon kalo ensem macam tu. dahlah ensem, body berpack2. haisy.. lupo jap tunang den ado sbolah. hahaha..

sampai naik ateh kusi nak nengok kombar tu. sompek laie posing dalam nani gayat2 takut kusi pocah..hahaha..

bilo game dah start, masing2 buek muko cuak. tapi ese maintain. bleh bukak bihun lagi. heh..

si kombar, zaquan kono bawak kuar 3 minit. pemain klantan tak abih2 attack dio. 3 kali kono usung kuar, last2 agak2 dah monang tu kuar trus. hisy..sian2..

ni muko2 bilo goal. memang melompek2 ar. tak ingat dunio dah time tu. ado skali tu sampai penutup tupperware melompek skali. hihi.

bilo bayang2 kemenangan berpihak kek nogori, bilo raso mental dah down, macam nilah jadi eh. dah tak ingat apo2 dah. sumo bondo nak bakar, sumo bondo nak baling. tak ponah masuk stadium agak eh. emo lobeh plak. rilek ar. macam orang india tengok wayang. hero mati, bakar panggung. haih.. takdo kesedaran sivik langsung. nasib baik tak jadi supporter klantan. membahayokan diri.

tapi nak buek camno. adat permainan. ado yang kalah dan ado yang monang. ado yang ensem ado yang tak. walaupun referee bias gilos, kemenangan berpihak kek nogori. berbaloi poie kali ni. nak balik jalan kaki 2km pon tak teraso sangat.hehe.

kesimpulan yang bleh dibuek, nogori main cantek..klate bukan tak cantek tapi nampak gile cuak and trus jadi kelam-kabut. pehtu nak main kasar plak. cubo main sopan2 sket len kali. supporters plak, macam yang dah sedio maklum, supporters klantan memang liar ar. dalam stadium bakar, baling player ngan botol sume, luar stadium leh tahan gak. pantang ade supporter nogori pandang skit yo dah jorit2. ado tu plak jorit bur*t. gilo. seb bek ado polis topi tu. agak eh dari kampung ulu mano ar tu datang. xdo adab! ado gak supporters dorang yang elok. maybe tu asal dari bandar sket. hehe.

tapi apo-apo pun enjoyyyy... lopeh ni leh poie lagi.

Berkatlah Yang Di-Pertuan Besar di Negeri Sembilan
Kurniai Sihat dan Makmur
Kasihi Rakyat Lanjutkan Umur
Akan Berkati Sekelian Yang Setia
Musuhnya Habis Binasa
Berkatlah Yang Di-Pertuan Besar Di Negeri Sembilan

petunjuk:cokau-cekau/dapat; ompek-empat/4; ese/se/den-saya; poie-pegi; dokek-dekat; goron-gerun; sodar-sedar; ponek-penat; boka-bekal; kek-kat; laie-lagi; boto-betul; ateh-atas; kombar-kembar; melompek-melompat; buek-buat; lopeh-lepas;